جدتي

جدتي ،
لا استطيع ان احكي لاحد ماحدث لي
لأني احبه ،
ولأني احبه ، اريد ان يحبه الجميع
اما انا ، ، عندما حدثت تلك المشكله ،، لم يتوانى عن الاتصال بوالده ،، وعلى الاحرى حتى والدته
ومن الارجح ان الجميع على اطلاع بمشكلتي معه
وانا من طرفي لا احد يعلم سواي
والله الذي هو ملجأي ومنجاي

ضربني يا جدتي
كسر انفي وفكك رقبتي

صدمت به
وحاولت انسى الموضوع
لكن الجرح اعمق
والله اعمق
لكني وعدت نفسي اني سأنسى
لاني احبه كثيرا اكثر من نفسي

اصبحت انسى اتنفس
ياجدتي
كيف يتسنى لشخص ان ينسى ان يتنفس

ياربي ، امسح قلبي بيدك
وامسح الوجع في نفسي
وامسح الاسى من وجنتاي

ياربي
احبه ، واجعله يحبني كما احبه واكثر
ياربي اجعلني قرة عينه واجعله قرة عيني

يارب استر علينا ووفقنا لما تحبه وترضاه

يارب ان كان فيه خير لي في ديني ودنياي عاجل امري واجله
يارب لا تحرمني منه

وان كان فيه شر واذى لي
فاصرفه عني واصرفني عنه
وارزقني الخير حث كان وارضني بi

عندما تقرأني هنا
اعلم اني احبك ، حد الوجع ، حد النحيب
حد الهستيريه
حد القهقه
حد السعاده والتعاسه

حد الاشياء الجميله ملها برضاك
والاشياء التعيسة كلها بزعلك

واحبك ، ,ابي احس فيك تحبني
ابي احس ، ابي اسمع
ابي انش الحب فيك

وبس

والدي ،

أبي ،،
انا قادمة اليك معبأة بالألم
اريد ان ارى وجهك الذي يمسح كل تضاريس الحزن فيّ

ما أريح

المشكله اذا ما قدرت تحكي لاحد عن مشاكلك
والمشكله لاصار الي يجرحك هو اللي بس يقدر يطيب قلبك
المشكله اني ما أريح

ماستر تقنيات التعليم

اليوم يستحق التوثيق
لأنه اول يوم لي وانا طالبه ماجستيريه نشيطه
وزوجي في خلفي قاعد يرد على الدعايه الي طلعت له في جهازه !!

المهم
انا مبسوطه اني قدرت اقدم على هالخطوه ، واصمل



توقيعي
وتاريخ امس بس لانه لسا ما نمت فهو للحين اليوم

اللهم أجعلني اول الواصلين إليك .

لم تكن السنتان كافيتان بأن اعرف ماهية الرجل الذي ارتبطت به
لم تكن كافيتان بأن أأمن بأن جميع الرجال ارجوزات
وغير صالحين تماما كما كانت تقول جدتي
لم اكن اعلم ان سعادتهم مرتبطه بتعدي حدود وطنهم
وان كل كآبة العالم يحشرونها في الداخل
عندنا نحن النساء المكبلات في اوطانهم
اوطانهم التي صنعوها بافكارهم السوداء هم وحدهم ولم تكن لنا يدا ابدا في بنائها
اوطانهم التي خلقوها
وسجنونا فيها
وكلما سنحت لهم الفرصه فروا هاربين
منا قبل وطنهم الاسود
في قلبي شيء انكسر
لايمكن اصلاحه
عندما تبني حياتك على اساس اعتقادات معينه
ثم تهتز اعتقاداتك
يصبح كل شيء غير واضح
كل شيء ضبابي
25 سنه عشتها عند والدي اطال الله في عمره وحفظه لي ولامي ولاخوتي واخواتي
25 سنه عشتها طفله
يوم واحد كان كفيل بتوبيخ وجلد هذه الطفله لتصبح امرأه سخيفه غبيه مغفله
كاللاتي كنت اسخر منهن سابقا
يوم واحد فقط

يالله أرحم حالي ، واجعلني اول الواصلين اليك

1\7\2010 موافق خميس 19\7\1431هـ

انا تزوجت
وعادي جدا ،، كل شي عادي !!

جدتي - يوم الاثنين 4-1-2010 الموافق 18-1-1431

ما يكفي الكلام احيانا ،،
ما يكفي للتعبير عن عميق الحز ن ، وخاصه ان كان يتعلق بالفقد
ما احب الحديث في الفقد لأني اخاف من النفاق ، ومن الرياء
لكني حزينه جدا ،، كل يوم لما ارجع من الشغل ، كنت قد تعودت اطل على جدتي
اسلم عليها ، راسها وخدها ويدها
واشم ريحته
ريحته الي الى الآن داخلي
ريحته الي كل ما دخلت قلت له ، ،الله يا جدتي يازين ريحتك ، تقولي ،،
امتس قالت لي هذا العطر من هند ، مادري هي صادزه ولا تبينن بس اتعطر
واقوله تعطرن من عطرتس
جدتي الي ريحته تجنن ، لكنه ماتت
جدتي الي كنت بمثل هذا اليوم
غالبا ما استلم الشفت ، وانام عنده
اقصد اسهر عنده
واشربه ماء
لأني ادري انه تحب الماء
اسهر ، وانشب بحلقه
تبين اكل
تبين حليب
تبين ماء
تبين اجيب لتس غطا ثاني
تبين اولع اللمبه
تبين اطفي اللمبه
تبين اسكر الباب
لين ما تقولي ،، لا يابنيتي خلص اسكتي ، انا مابي اتكلم
جدتي الي لا جا الفجر وقامت عطشانه وجيته اسقيته ،، تنسى ، وتقوم الصبح
وتقولي ربي ارسلي من عنده يسقونن ويشربونن ويوكلونن
وانا اسكت ماعلمه انه انا الي اشربه بالليل عشان ابيه تحس ان ربي يحبه ويرسله ملائكه تخدمه لا احتاجت
جدتي الي لا جا الصبح وقشرت له البيضه وجلست ربع ساعه تاركته تحلف علي الا اكله لين ما اجيب لي بيضه عنده واوريه اياه عشا نترضى تاكل
وبعد ما تروق وتفطر وتشرب شايه بالحليب شايه الحالي جدا والحليب الكثير مره
جدتي الي تسألن لا روقت / انتي ما اعرستي
اقوله لا
تقول ليه ما تعرسين ، اقوله توي صغيره
وتشهق وتقول يالله ترزقتس الرجل الصالح
جدتي الي اشغل عنده التلفزيون الصبح واتابع افلام اجنبيه
ولا شافت لقطه نص كم ، قالت هذولي حريم ولا رجال وحريم
جدتي الي يوم شافت يسرى بالتلفزيون قالت / هذي بزعمه صغيره تشبب
جدتي الي لا جا الظهر يالله يالله نقنعه انه ماتغدت وان معدته فاضيه
عشان تغدا
ولا جا العصر نامت ، ولا جا الليل صحت تقول ما غمضت عيني
جدتي اللي لا شافتن قالت ووووووه انتي الصديقه الصافيه
جدتي الي انا صديقته الصافيه
جدتي الي كل ما شافتن رفعت يدينه ودعت لي
جدتي الي قبل ما تموت بساعه مسكتن تسألن عن شغلي الجديد ودعت لي كم دعوه وشربته مويا وسلمت عليه ورحت انام
جدتي الي بعد هالساعه دعونن يقولون جدتي تعبانه يوم ركضت له ابي الحق عليه يوم ماتت
جدتي الي خمييييييييييييييييييييييييييييييييييته على قلبي على قلللبي خميته ونمت على صدره يوم ماتت
بس ادري انه كانت خايفه من هاليوم مع انه تقول ، انا عشت عمري وعمر غيري
انا كل الي كبري ماتن وانا لا
جدتي الي يوم ماتت كلنا كنا عنده وندعي له ونخمه وماحنا مصدقين انه كذا بكل هالسهوله ماتت
كلنا ماحنا مصدقين
جدتي الي وانا اغسله مع الي يغسلن الموتى
احط يدي تحت راسه عشان ما يوجعه الخشب ، ما اقتنعت انه ماتحس بالخشب
جدتي الي ما اقتنعت انه ماتت الا يوم حطو قطن بافمه
جدتي الي كانن يذكرن الله وهن يغسلنه لأنه كانت اخف من انه تكون ميته
جدتي الي سلمت عليه وحبيت راسه وحبيته وكنت انا اخر من شربه ماء
جدتي هذي الي كل هالكلام الي فوق ، فقدته
فقدته امس وقبله واليوم وبكرا
جدتي هذي الي كل ما رجعت ادوره فقدته
جدتي الي كل يوم اقول جدتي بس
صرت اقول جدتي ، واسكت شوي واتذكر انه ماتت
وتركتن
واقول الله يرحمه
احس ان ماودي اقول الله يرحمه ،، استغفر الله
بس لاني ماني مقتنعه انه ماتت
جدتي الي تقول
لا تصيحين عند الناس
وياويلكم تصيحون علي ، مابي احد يصيح علي
جدتي الي ودي اصير معه
ودايم اقوله يا جدتي ياعل يومي قبل يومتس
وتصرخ علي تقول استغفري استغفري
انا مابقى لي شي واقوله لا انا ابي معتس
ربي يومنه استجاب دعوته ليه ماخذانن معه
انا احبه
انا احسه مو بس جدتي هي بنتي وهي صديقتي
جدتي الي اسولف له عن العشق
واقصد له وتقولي بمين تقصدين
جدتي الي هي عمري
جدتي الي هي روحي
جدتي الي كنت اتمنى اتمنى افرح قلبه بشي
بس كان كل شي عنده عااادي بس تبي تخلص من الدنيا لانه تعبت منه ، وطاب خاطره من الدنيا
جدتي الي كل الكلام اللي فوق
راحت عند ربي ، احس انه ما تبينن راحت وتركتن
احس انه بتنسانن
اخاف انه بتنسانن مابي افكر حتى انه ممكن تنسانن
جدتي الي اغار عليه من بنته
مابيه تروح لبنته لأني احبه ولأني مابيه تصير اقرب لأحد مننا حنا
جدتي الي كل يوم انسى وادخل غرفته ادوره ابي اسلم عليه
جدتي الي اليوووووووووم
اليووووووووووم موعدي معه
اليوووم موعدي معه والله اليوووووم
جدتي
الي ودي انه تطمن قلبي باي شي
ودي تجينن تزورن ، ودي احس به ودي ادري وش تسوي
ودي تجي وتخمن وتطبطب على راسي وتقولي خلص انا طيبه وانا مبسوطه انا ماراح انساتس
ودي تجينن وتقولي انا ماراح انساتس
هذا كله عن جدتي
ولا خلصت بس تعبن البكي
تعبن الصياح
تعبت من الصياح
بس قلبي احس انه منزووووووع من محله
احد ساحبه من مكانه
واليوم صصصصصصصصصصصعب مررره صعب
لأنه موعدي معه صعب

الله يرحمه ويغفر له ،،